© Federación Autismo Galicia | 13/12/2021 | A nova Estratexia Española de Apoio Activo ao Emprego recoñece o autismo de maneira específica.

A nova Estratexia Española de Apoio Activo ao Emprego recoñece o autismo de maneira específica.

Aprobada esta semana polo Consello de ministros, conforma o marco estatal de referencia dos servizos públicos de emprego. O texto incorpora varias modificacións en materia de emprego que son moi beneficiosas para as persoas con autismo.

O Consello de ministros aprobou esta semana o Real Decreto polo que se aproba a Estratexia Española de Apoio Activo ao Emprego 2021-2024, que conforma o marco estatal de referencia dos servizos públicos de emprego para deseñar e xestionar as súas políticas. Un dos cinco obxectivos estratéxicos deste novo texto é conseguir un enfoque centrado nas persoas e nas empresas, acompañando de maneira personalizada a demandantes de emprego e prestando un servizo individualizado aos e as empregadores.

Neste sentido, a Estratexia incorpora varias modificacións en materia de normativa de emprego que son moi importantes e beneficiosas para as persoas con trastorno do espectro do autismo ( TEA) que, convén lembrar, conforma o colectivo da discapacidade coa taxa máis alta de desemprego (entre o 76 e o 90%, segundo cifras de Autismo Europa). Entre elas, destacan:

• Modificación do Real Decreto 469/2006, do 21 de abril, polo que se regulan as unidades de apoio á actividade profesional no marco dos servizos de axuste persoal e social dos Centros Especiais de Emprego
• Modificación do Real Decreto 870/2007, do 2 de xullo, polo que se regula o programa de emprego con apoio como medida de fomento de emprego de persoas con discapacidade no mercado ordinario de traballo
• Modificación do Real Decreto que regula os programas comúns de activación para o emprego. 

Ata o de agora, estes textos non recollían de maneira específica ás persoas con  TEA ou o facían cunha redacción que vinculaba o trastorno á discapacidade intelectual o que, de maneira efectiva, deixaba fóra a moitas posibles beneficiarias do noso colectivo ou lles xeraba problemas de acceso e acreditación. O novo texto modifica esta normativa, que pasa a recoñecer de maneira específica o trastorno do espectro do autismo na súa referencia ás persoas con discapacidade e, agora si, desvinculado da discapacidade intelectual.

Autismo España leva moito tempo traballando para conseguir a modificación da normativa en materia de emprego, conscientes da importancia para o noso colectivo e os obstáculos que supoñía. Estas modificacións incumben aos beneficiarios do emprego dentro dos centros especiais, o emprego con apoio, unha das figuras máis importantes en materia laboral para as persoas con  TEA, e tamén aos programas comúns de activación para o emprego, que recentemente denunciamos que na súa última actualización deixaban fóra ás persoas con  TEA. 

Outros desenvolvidos normativos que afectan as persoas con  TEA

Doutra banda, o Consello de ministros do pasado martes aprobou tamén outros dous desenvolvementos normativos que afectan o colectivo de persoas con  TEA e as súas familias. Trátase de:

• Anteproxecto de Lei de Emprego: para dar resposta ás necesidades do mercado laboral e combater as debilidades estruturais presentes, como o desemprego ou o paro xuvenil. Con esta norma preténdese que o Servizo Público de Emprego Estatal ( SEPE) consiga maior rapidez, axilidade e flexibilidade. Ademais, a Lei de Emprego recolle unha nova figura: os Acordos e Recomendacións Específicas para o Fomento do Emprego Digno que se formularán pola Conferencia Sectorial de Emprego e Asuntos laborais.
• Estratexia de Saúde Mental: aprobada por unanimidade polas Comunidades Autónomas no Consello Interterritorial de Saúde, pretende atender de forma integral a aquelas persoas con problemas de saúde mental, promovendo un modelo de atención comunitario e integral para favorecer a recuperación e inclusión social. Son moitas as persoas con  TEA que presentan polo menos un trastorno  comórbido de saúde mental ao longo da súa vida, sendo os máis frecuentes os trastornos do estado de ánimo (depresión) e os trastornos de ansiedade.

Autismo Galicia desde o colectivo do autismo xunto a Autismo España celebramos que o Goberno siga dando pasos para recoñecer as necesidades específicas das persoas con  TEA, especialmente no referente á promoción do seu acceso ao mercado laboral. Seguiremos traballando para garantir os dereitos do colectivo e conseguir a igualdade de oportunidades.

 

 

 

Fonte AUTISMO ESPAÑA

Volver