Os menores con discapacidade son un dos colectivos mais intensamente protexidos polas leis, sen embargo, ás veces non se respectan debidamente a súa imaxe e a súa intimidade. Por ese motivo, o Comité Español de Representantes de Persoas con Discapacidade colaborará coa Fiscalía de Menores para mellorar a protección da imaxe pública dos nenos e nenas con discapacidade nos medios de comunicación.

Para captar e facer públicas imaxes de rapaces, con ou sen discapacidade, é obrigatorio dispor dunha autorización expresa dos seus pais ou titores legais. Nembargantes, se o uso destas imaxes resulta ofensivo, degradante ou non respecta a intimidade do neno, o Ministerio Fiscal pode intervir anulando a autorización paterna.

Ante os casos recentes de mal uso da imaxe pública de menores con discapacidade en emisións televisivas, o Ministerio Fiscal e o CERMI decidiron establecer mecanismos de intercambio de información e consultas permanentes. O obxectivo é evitar que se sigan lesionando dereitos fundamentais como o da intimidade e a propia imaxe; que están recoñecido pola Constitución Española, pola Convención de Dereitos do Neno e pola Convención sobre os Dereitos das Persoas con Discapacidade.

Desde Autismo Galicia insistimos no respecto escrupuloso á intimidade e á propia imaxe das persoas con discapacidade, menores ou adultos, e levamos a cabo estrictas políticas de protección de datos e imaxe dos usuarios cos que traballamos.

Fonte: CERMI

Como parte do acto de clausura da exposición ARTEfactos, a Orquestra Castro Navás, composta por persoas con autismo do centro do mesmo nome, actuará o próximo 28 de febreiro no Colexio de Fonseca, onde se atopa tamén a mostra Olladas dende a diversidade.

Esta orquestra, que comezou hai 13 anos, está composta por 10 persoas, das que mais da metade teñen algún trastorno do espectro do autismo. A dirección da orquestra corre da man de Carlos Veiga, músico profesional que foi contratado pola Fundación Menela para dar forma ao seu proxecto musical. “O fantástico é que a xente verá a orquestra e non saberá distinguir quen ten autismo e quen non”, apunta Cipriano Jiménez, Director Xeral de Fundación Menela e Vicepresidente de Autismo Galicia.

“As persoas con autismo teñen unha serie de capacidades que ás veces están sen descubrir” engade Cipriano Jiménez. Sobre esta idea, Fundación Menela cimentou, non só unha orquestra, senón tamén, un aula de pintura do que saíron as pezas de Yolanda Manrique e Luis Eduardo González e que se expoñen ata o xoves en ARTEfactos.

Baixo o lema “Dinamitando prexuízos desde a integración”, a mostra ARTEfactos pretende ser un espazo para a crítica, a mudanza e a rebeldía a través de diferentes expresións artísticas. Nela participan Autismo Galicia, Fundación Menela, a Rede Museística Provincial de Lugo, a Asociación Diversos de A Coruña, o Museo de Bellas Artes de Murcia e a Unidad de Demenecias do Hospital Universitario “Virgen de la Arrixaca” tamén de Murcia.

Desde Autismo Galicia, queremos convidarvos ao acto de clausura este xoves 28 de febreiro ás 6 da tarde no Colexio de Fonseca en Santiago de Compostela. A Orquestra Castro Navás interpretará pezas de música tradicional galega como o Pasodobre de San Roque e versións de autores tan variados como Manu Chao, Yann Tiernsen, Milladoiro ou Loreena McKennitt.

Imaxe da obra de Yolanda Manrique e Luis Eduardo González, tamén exposta na mostra ARTEfactos.