O pasado 1 de marzo entrou en vigor o real decreto que establece o Convenio Especial de Seguridade Social co obxectivo de dar unha maior seguridade no futuro ás persoas con unha discapacidade que afecte seriamente ás súas posibilidades de atopar un traballo.

Por primeira vez, ábrese a posibilidade de que estas persoas coticen á Seguridade Social, de forma que poidan completar a súa carreira de cotizacións (tanto se traballaron antes como se non) e no futuro ac cedan a prestacións por xubilación, morte, viuvez ou orfandade, mesmo a favor dun familiar.

Para acceder a este convenio, débese presentar a solicitude na Dirección Provincial da Tesourería Xeral da Seguridade Social que corresponda ao domicilio da persoa e recibiría resposta no prazo de 3 meses.

Autismo España, ASPACE, Down España e FEAFES crean o Grupo de Converxencia Asociativa, que nace para elaborar unha estratexia común que permita aglutinar esforzos para os colectivos aos que representan. Xuntos agrupan a 1.200.000 persoas que, polas súas particulares características, contan con obxectivos e intereses comúns.

Nunha das súas primeiras reunións, o pasado 7 de marzo, o Grupo de Converxencia Asociativa mostrou a súa preocupación ante as desiguais oportunidades que teñen as persoas con discapacidade en función do seu lugar de nacemento ou residencia. Os recursos ofertados polas administracións (tanto de atención como de financiamento para as entidades que os atenden) varían de forma considerable en función da comunidade autónoma e, dentro delas, de se a residencia se atopa no medio rural ou urbano, o que afecta de forma directa á súa calidade de vida.